حسبى الله ونعم الوكيل

دا موضوع استفزنى اوى وهو من فتره وللاسف بسبب الامتحانات لسه شيفاه من يوم بس وحبيت تشاركونى اراى

بس هاسالكم ايه دا؟ ايه اللى حصل بجد؟

خالد محمد سعيد
شاب مصري في ال28 من عمره
شاب عادي وبسيط زيه زي اغلب المصريين .. شاب في حاله ومش بتاع سياسه ولا هو معارض ولا حتى حزب وطني ،، شاب ماشي جنب الحيط بالأصح

في يوم خالد كان نازل سايبر النت اللي قصاد بيتهم في منطقة سيدي جابر – محافظة الاسكندريه
ويادوبك دخل السايبر ودخل وراه اتنين مخبرين كتفوه من ورا ونزلوا ضرب فيه وتخبيط في دماغه .. راح صاحب السايبر افتكرهم جايين يقبضوا عليه لأي سبب فخرجهم من السايبر ،، راحوا ساحبين خالد لمدخل العماره اللي قصاد السايبر ولأكتر من 20 دقيقه نزلوا ضرب فيه بالشلاليت والأقلام لغاية لما اغمى عليه .. وبعدين واحد فيهم مسك دماغ خالد ونزل رزع فيها في سلام العماره الرخام والدرابزين لغاية لما اتهشمت تماما

وراحوا شايلين خالد – زي الدبيحه – ولا حول ولا قوة الا بالله وراحوا رموه في البوكس وطلعوا بيه على قسم الشرطه وسط ذهول ورعب من المواطنين اللي شافوا الجريمه البشعه دي وماقدروش ينجدوه حتى ..

وبعد ما يقرب من 8 لـ 10 دقايق رجع البوكس ورموا جثة خالد في مدخل العماره ..
جات عربية اسعاف ماحدش يعرف مين اللي جابها وأمُر المسعفين بكتابة تقرير ان خالد مات مختنقا نتيجه ابتلاعه للفافتين حشيش وقفوا في قصبته الهوائيه ..

وجاء رجالات مباحث قسم شرطة سيدي بشر الى المنطقه ليس من أجل التحقيق وانما من اجل ممارسة كل انواع الضغط والارهاب على شهود الواقعه وأهل المنطقه لثنيهم عن الشهاده على الواقعه ..

وظل الاعتقاد السائد لفتره ليست بالقصيره أن سبب ماحدث لخالد انه اعترض على تفتيشه بشكل مهين
حتى بدأت تتكشف الحقيقه ..

في حوار بين د / أيمن نور ووالدة القتيل اخبرته انها تعتقد ان سبب مقتل ابنها انه حصل على فيديو يوضع ويثبت على رجال مباحث قسم شرطة سيدي جابر تجارة المخدرات .. وانها تشك في كونهم قاموا بقتله لاخفاء هذا الدليل الذي كان ينوي به فضحهم وفضح انشطتهم المشبوهه ..

لينك الفيديو المصور داخل قسم الشرطه يظهر بوضوح غرفة معاون مباحث قسم شرطة سيدي جابر ، وحوله عدد من المخبرين و امناء الشرطة النظاميين ، والضابط يضع أمامه كمية 80 كيلو حشيش وكميات من البانجو ، والأموال السائلة

.. الضابط يسأل عن مخبره السري "عوض" وهو الذي سبق ونشرنا من اللحظة الاولي عن مشاركته هو ومحمود الفلاح في إغتيال خالد !! ويقول الضابط كلاماًَ يفيد أنه إنتهي تواً من ضبط هذه الكمية الكبيرة من المخدرات والأموال !! لكنه بدلاً من تحريزها ووزنها ، واحالتها للنيابة هي والأموال المظبوطة حدث الآتي

.. يُظهر الفيلم الضابط وهو يعد الأموال المظبوطة بحوزة المتهمين ، ثم يشير بيده ليعد عدد الموجودين بالغرفة من رجاله ، ويعد نفسه معهم - ايضاً - في محاولة لتحديد نصيب كل فرد من فريقه في الأموال !! في تقسيم واضح للأموال المظبوطة بدلاً من تسليمها للنيابة ضمن حرز القضية !!

.. في مشهد آخر بذات الفيلم الفضيحة يظهر أحد المخبرين وهو يقتطع قطعة من المخدرات ويقول للضابط : " مبروك عليك يا باشا " !! ثم ضحك المخبر وهو ينصرف قائلاً : " سلام عليكم بقه " والضابط يرد عليه قائلاً : " استني خدلك واحده "!!

(اسيبكم مع الصور للوقفه الاحتجاجيه اللى حصلت فى الاسكندريه وكمان لصور الشهيد خالد قبل وبعد الحاثه)الله يرحمه

الجمعة دي بجد لازم كلنا نلتزم بالقوانين لأن كان فيه حالات عدم التزام .. الأمن هيبقى أصعب المرة دي ولازم كلنا نوصل رسالتنا بشكل حضاري وبدون ما أي واحد فينا يتخانق مع أي أمن:

- الوقفة الصامتة هتكون في كل أنحاء مصر من إسكندرية لأسوان. أي شباب في أي محافظة يتفقوا مع بعض .. وهتكون في أي مكان فيه بحر أو نيل. والمحافظة اللي مفيهاش بحر أو نيل يبقى في الحدائق العامة وتجمعات الناس. ومش مهم الأعداد المهم إننا نثبت إننا شباب إيجابي رافض للظلم.

- ممنوع منعا باتا إنك تجيب معاك أي منشورات أو أوراق أو يفط. مش عايزين نعرض أي حد للخطر أو تطبيق قانون الطوارئ عليه. واللبس يكون إسود وبلاش أي حد يلبس تي شيرت عليه صورة خالد أو شعارات ضد الحكومة.

- اتفق مع شوية من إصحابك كمجموعة إنكم تروحوا مع بعض بس قبل ما توصلوا للمكان اللي هتقفوا فيه اتفرقوا واقفوا كل واحد على بعد خمسة متر من التاني.

- كل واحد يكلم أهله .. والده ووالدته يروحوا معاه .. عايزين نشوف الأطفال والأمهات والآباء كلهم .. محدش هيعرف يوقفنا لو كلنا كنا ايد واحدة. وصور الأمهات كانت مالية فيديوهات وصور الوقفة.

- مهم جدا يا شباب .. يكون بيننا وبين بعض مسافة تلاتة إلى خمسة متر .. عشان منبقاش شكلنا متجمع وعشان ننتشر على البحر والكورنيش المنظر أقوى بكتير من منظرنا واحنا جنب بعض بالإضافة إلى إنه أقل مخاطرة.

- ضهرنا للشارع ووشنا للبحر .. إنا زعلانين متضايقين مش بنكلم حد مش بنضحك مش راضيين عن اللي بيحصل في مصر من إهانة لشباب مصر.

- برضه هنجيب معانا القرآن أو الإنجيل أو جهاز الإم بي ثري ونسمع حاجة مفيدة.

- إذا تعرضلك الأمن وقال لك مينفعش تقف هنا .. اتكلم معاهم بكل أدب وبلاش أي عصبية وقول لهم إنك مش بتعمل أي حاجة غلط وإنك واقف في يوم اجازتك بتحضر منظر الغروب وإنك إنسان محترم ومش بتضايق أي حد. ولو زادت حدة الكلام بتاعهم اتحرك وامشي في حتة تانية. ولو منعوا الوقفة على الكورنيش اتمشي في وسط الشوارع وصور أي حد لابس اسود زيك.

- متسمعش كلام أي حد بيقول لك إنه من اللي بينظموا الوقفة .. مفيش أي منظمين للوقفة دي .. ومتتكلمش مع أي حد حتى لو لابس إسود زيك.

- مهم جدا .. لو إنت واقف في حتة وابتدى مجموعة شباب لابسين إسود يخالفوا أي من القوانين اللي فوق دي يا ريت تسيب المكان بسرعة وتختار مكان تاني.

- يا ريت تاخد معاك كاميرا كويسة عشان تصور نفسك وتصور بقيت الناس .. الصور اللي احنا صورناها المرة اللي فاتت بتدب الأمل في نفوس كل الناس .. يا ريت يبقى عندنا صور جميلة المرة دي كمان.

- لو رحت مكان ولقيته فاضي أقعد برضه .. أقوى صور المرة اللي فاتت كانت شباب راح وقعد على البحر زعلان وصور نفسه .. المهم مش اللي شايفينك وانت قاعد .. احنا رسالتنا هتوصل قوية جدا المرة دي للإعلام خاصة إنهم شافوا الوقفة اللي فاتت.

(دا اللى حصل النهارده الجمعه (25-6-2010)
والكلام دا واحد هو اللى قاله حبيت تشوفوا ايه اللى حصل فى اسيوط النهارده)

الله اكبر على شباب اسيوط وقفة كانت رائعة فى اسيوط لمدة 25 دقيقة وتم فضها عن طريق الامن ومشينا فى احترام رغم كل شى اقدرنا نوصل الرسالة اكثر من 100 شاب وفتاة فى اسيوط كنا ملتزمين بكل قواعد التحضر انا حاسس انى اخيرا عملنا حاجة مفيدة

ما بين 100 و120 شاب وفتاة قاموا بوقفة احتجاجية صامتة على كورنيش النيل الصورة كانت جميلة لشباب واعى مثقف ومتحضر جدا وتم فض الوقفة بعد 25 دقيقة عن طريق الامن المرتعب من منظرنا انا شفت الرعب فى عيونهم منا اجمل حاجة كل الاعمار كانت موجودة

رغم انهم فضوا الوقفة بعد اقل من نصف ساعة الا ان رسالتنا وصلت بقوة بدليل رعبهم منا معقول الى حصل ده الله على شباب اسيوط ومصر كلها بجد بنات وولاد فى اعمار مختلفة الناس فى الشارع وقفت سالتنا بنعمل ايه اعجبوا بينا جدا محدش اتريق بالعكس فى ناس وقفوا معنا بجد هو ده شعب اسيوط شعب مصر لسه فى خير كتتير قوى

فى بنتين صغييرين قوى كانوا معانا انا عايز احيهم سنهم اقل من 14 سنة سالتهم جايين عشان الوقفة قالوا اه ووقفوا جنبنا فى بنات بجد تحسوا زى الرجالة واحسن ووقفوا بقوة مخفوش كانت فى ام معاها بناتها الاتنين بجد بنات تشرف شباب جميل جدا

انا عايز اشكر كل الشباب اللى راح بنات وولاد بجد رجالة وشباب واعى مثقف متحضر قدروا يجبروا الامن على احترامنا كلمونا قالوا امشوا قلنالهم فى مشكلة قالوا كفاية كده لم نعطهم الفرصة فى اتخاذ اى شى عرفناهم ان فى شباب بجد فى اسيوط كانوا نظراتهم كلها استغراب والله يا جماعة كان فيه رعب مش مصدقين بجد وكمان فيهم ناس كانوا مش قادري...

ودى صور للوقفه الاحتجاجيه اللى حصلت فى اسيوط اسيبكم مع الصور