الجمعة دي بجد لازم كلنا نلتزم بالقوانين لأن كان فيه حالات عدم التزام .. الأمن هيبقى أصعب المرة دي ولازم كلنا نوصل رسالتنا بشكل حضاري وبدون ما أي واحد فينا يتخانق مع أي أمن:
- الوقفة الصامتة هتكون في كل أنحاء مصر من إسكندرية لأسوان. أي شباب في أي محافظة يتفقوا مع بعض .. وهتكون في أي مكان فيه بحر أو نيل. والمحافظة اللي مفيهاش بحر أو نيل يبقى في الحدائق العامة وتجمعات الناس. ومش مهم الأعداد المهم إننا نثبت إننا شباب إيجابي رافض للظلم.
- ممنوع منعا باتا إنك تجيب معاك أي منشورات أو أوراق أو يفط. مش عايزين نعرض أي حد للخطر أو تطبيق قانون الطوارئ عليه. واللبس يكون إسود وبلاش أي حد يلبس تي شيرت عليه صورة خالد أو شعارات ضد الحكومة.
- اتفق مع شوية من إصحابك كمجموعة إنكم تروحوا مع بعض بس قبل ما توصلوا للمكان اللي هتقفوا فيه اتفرقوا واقفوا كل واحد على بعد خمسة متر من التاني.
- كل واحد يكلم أهله .. والده ووالدته يروحوا معاه .. عايزين نشوف الأطفال والأمهات والآباء كلهم .. محدش هيعرف يوقفنا لو كلنا كنا ايد واحدة. وصور الأمهات كانت مالية فيديوهات وصور الوقفة.
- مهم جدا يا شباب .. يكون بيننا وبين بعض مسافة تلاتة إلى خمسة متر .. عشان منبقاش شكلنا متجمع وعشان ننتشر على البحر والكورنيش المنظر أقوى بكتير من منظرنا واحنا جنب بعض بالإضافة إلى إنه أقل مخاطرة.
- ضهرنا للشارع ووشنا للبحر .. إنا زعلانين متضايقين مش بنكلم حد مش بنضحك مش راضيين عن اللي بيحصل في مصر من إهانة لشباب مصر.
- برضه هنجيب معانا القرآن أو الإنجيل أو جهاز الإم بي ثري ونسمع حاجة مفيدة.
- إذا تعرضلك الأمن وقال لك مينفعش تقف هنا .. اتكلم معاهم بكل أدب وبلاش أي عصبية وقول لهم إنك مش بتعمل أي حاجة غلط وإنك واقف في يوم اجازتك بتحضر منظر الغروب وإنك إنسان محترم ومش بتضايق أي حد. ولو زادت حدة الكلام بتاعهم اتحرك وامشي في حتة تانية. ولو منعوا الوقفة على الكورنيش اتمشي في وسط الشوارع وصور أي حد لابس اسود زيك.
- متسمعش كلام أي حد بيقول لك إنه من اللي بينظموا الوقفة .. مفيش أي منظمين للوقفة دي .. ومتتكلمش مع أي حد حتى لو لابس إسود زيك.
- مهم جدا .. لو إنت واقف في حتة وابتدى مجموعة شباب لابسين إسود يخالفوا أي من القوانين اللي فوق دي يا ريت تسيب المكان بسرعة وتختار مكان تاني.
- يا ريت تاخد معاك كاميرا كويسة عشان تصور نفسك وتصور بقيت الناس .. الصور اللي احنا صورناها المرة اللي فاتت بتدب الأمل في نفوس كل الناس .. يا ريت يبقى عندنا صور جميلة المرة دي كمان.
- لو رحت مكان ولقيته فاضي أقعد برضه .. أقوى صور المرة اللي فاتت كانت شباب راح وقعد على البحر زعلان وصور نفسه .. المهم مش اللي شايفينك وانت قاعد .. احنا رسالتنا هتوصل قوية جدا المرة دي للإعلام خاصة إنهم شافوا الوقفة اللي فاتت.