يـــــوم فــــــي حياة عضـــــو

يـــــوم فــــــي حياة عضـــــو


--------------------------------------------------------------------------------












موضوع جميل وخفيف وياليت الجميع يشارك فيه
الفكره عجبتني وحبيت اطبقها في منتدانا المتألق...

سنقوم باستضافة عضو..يحكي لنا عن مسار يومه
منذ ان يصحو صباحاً حتى يحل الليل وينام...

متحدثاً بحريه تامة وبأسلوب..عفوي جداً.وكم جميل لو كان به
بعض المــرح والإنطلاق والتحرر من قيود المواضيع الرتيبه

ثم بعد أن ينتهي يقوم هو شخصياً بأختيار عضو آخر
ليحكي لنا عن تفاصيل يومه وكيف يقضيه...

طبعاً حبذا لوكان التحدث عن يوم عادي وليس يوم إجازه
وذكر التفاصيل ليكون الموضوع ممتع...

طبعا كل عضو نختاره ويتكلم عن نفسه بعد ان ينتهي
يختار هو العضو الذي يليه وهكذا....


انا هرشح ساندى

نسيت اقولكم ان الموضوع برده مدته يومين

اولا انا اسفه بجد لسه شايفه الموضوع ليا طلب عندك اختى ريم اول ماترشحى حد ابعتيله رساله على الخاص شكرا

ثانيا موضوع رائع وجميل

ثالثا نبتدى بقى

اول حاجه بعملها اول يومى اصلى الصبح ولو كنت صاحيه على الفجر بصليه

بتكلم مع امى شويه وبعد كدا بنفطر بس قبل الفطار كوب الشاى علشان اصحصح

بعد كدا بفتح المنتدى من 9 الى 12 وبخرج مع اصحابى امممممممم عادى دا اليوم بتاعى واحيانا بقراء كتب بس اليوم بتاعى بيتغير من وقت لتانى يعنى الاجازه غير الدراسه طبعا

شكرا على الموضوع وتقبلى مرورى

شكرا لمرورك اختى ساندى بس انا قصدى اختارى يوم معين وشوفي انتى عملتى فيه ايه واكتبي عنه
يعنى مش تكتبى الروتين اليومى في الايام كلها لا هوه يوم معين سواء كان يوم عادى او غير عادى يوم واحد بس
فياريت نبتدى تانى انا كنت عاوزة ابتدى بالفكره بس لقيتها دلوقتى مش وقتها خالص ع الاقل اخلص امتحاناتى علشان يومى بيبقى حافل في الايام العادية ومش ضرورى تطلعينا على خصوصياتك
يعنى لو زورتى صاحبة ليكى مش ضرورى تقولى اسمها
شكرا ليكى بس ياريت تبتدى تانى

ههههههههههه فكرة جمييييييييييله قوى مستنيينك تحكييلنا يا سااندى وربنا يوفقك يا ريييم

مرسي ليك سمارت وربنا يوفقك كمان في الدنيا والاخره

اوكى واضح انى فهمت الموضوع غلط طيب نبتدى من تانى


بصوا بقا اليوم الى هاحكى عنه دا يوم فات

كا العاده صحيت الصبح بردوا وشوفت الموبايل وكلمت ماما وشربت الشاى

المهم اتصلت صاحبتى وقالت انها زهقانه ويالا نخرج طبعا اتنرفزت لانى مش بحب اخرج فجاه كدا بص قولت يالا اهو نغير جو

المهم خرجنا انا صحباتى واتمشينا وروحنا نادى او بمعنى اصح حديقه

والطبيغى انك تطلبى حاجه فى المكان دا المهم الجارسون واضح انه كان مطبق يومين ولا حاجه لدرجه انى شويه كدا واحط مايكريفون فى اذنه علشان يرد عليا وقولت لصاحبتى اطلبى انتى دا الراجل نايم ولا مات

والحمد لله ان فى واحد تانى واخد باله وعمال يضحك وقالى اتفضلى يا فندم اطلبى

المهم انا نسيت كنت عاوزه ايه من الموقف دا روحت قولتله صحى الراجل دا بدل ما اطلب 3 نسكافيه وطبعا الراجل ضحك وقالى لاء انا قصدى حضرتك تشربى ايه


وخلاص طلبنا وعدى الموضوع بس كنا بنضحك للصبح وروحت البيت وفتحت المنتدى وبعد كدا نمت على الساعه 12 تقريبا لانى كنت بكلم دكتوره لوكا على الميل

انا اسفه انى نسيت ارشح العضو الى بعدى
هارشح سمارت

متشكر علي الترشيح
انا بقي يوي بيبدا قبل الفجر بصلي ركعتين واستغفر وبعدين اتسحر
بروح اصلي الفجر واسمع درس عن صحابيات الرسول واجلس في المسجد اقرا قران عند الشروق بصلي الضحي وارجع انام لحد الظهر
بصلي الظهر وبعدين بنعمل جلسة تدبر للقران في البيت وبعدين لحد العصر قران ومنتدي او اي حاجة
بصلي العصر واقعد في حلقة تلاوة في المسجد وبعدين بساعد في مائدة الرحمن وبعدين ارجع البيت اساعد والدتي واقول اذكار المساء لحد المغرب
بصلي المغرب وارجع افطر وندردش مع بعضينا لحد العشاء
بصلي العشاء والتراويح وبعدين بزور حد من قرايبي او اخخرج مع زمايلي او بمدة ساعة
بعدها برجع البيت اقرا قران وادخل المنتدي لحد قبل الفجر بساعة ويتكرر اليوم وارشع د/لوكا

شكرا ع الترشيح

الله موضوع جميل اوى انا ساعات ليا ايام طاه يعنى باعمل فيها حاجات غريبه وفي وقت قياسى لو اترشحت هاحكى عن يوم منهم ان شاء الله

smart dentist كتب:

متشكر علي الترشيح
انا بقي يوي بيبدا قبل الفجر بصلي ركعتين واستغفر وبعدين اتسحر
بروح اصلي الفجر واسمع درس عن صحابيات الرسول واجلس في المسجد اقرا قران عند الشروق بصلي الضحي وارجع انام لحد الظهر
بصلي الظهر وبعدين بنعمل جلسة تدبر للقران في البيت وبعدين لحد العصر قران ومنتدي او اي حاجة
بصلي العصر واقعد في حلقة تلاوة في المسجد وبعدين بساعد في مائدة الرحمن وبعدين ارجع البيت اساعد والدتي واقول اذكار المساء لحد المغرب
بصلي المغرب وارجع افطر وندردش مع بعضينا لحد العشاء
بصلي العشاء والتراويح وبعدين بزور حد من قرايبي او اخخرج مع زمايلي او بمدة ساعة
بعدها برجع البيت اقرا قران وادخل المنتدي لحد قبل الفجر بساعة ويتكرر اليوم وارشع د/لوكا

بارك الله فيك ماشاء الله بجد ربنا يوفقك

الصراحه انا مش عايزه اتكلم عن يومي في رمضان ده شئ احتفظ بيه لنفسي
بس ممكن احكي يوم عادي في الدراسه
يعني بتحصل احداث اكتر
المهم بما اني ساكنه بعيد جدا عن الجامعه
فلازم اصحى كده تقريبا من بعد الفجر حتى لو كان عندي محاضره الساعه 9
المهم اصلي الفجر واقعد اكوي والبس وكده
انزل من البيت حوالي الساعه 7 الا ربع
اروح على الموقف واركب ميكروباص معهد (ويا سلام لو اخويا رضي عني وصحي وصلني الصبح باصلي ركعتين شكر لله )
المهم ميكروباص معهد ده بيروح عند معهد خدمه اجتماعيه اللي في اول عباس تقريبا
انا بانزل منه في رابعه واخد تاكسي اوميكروباص لحد الجامعه
بس لو نزلت متاخر شويه مش هلاقي مواصلات وهاضطر اروح بالمترو وده حكايته حكايه
المهم وانا في الميكروباص بتاع معهد ده لازم اشغل نفسي باي حاجه لسببين
ان الطريق طويل
والتاني انك ممكن تتشل لو سمعت ايه اللي بيحصل حواليك
ماشاء الله على ادب واحترام بنات المعهد
والاولاد بيعاملوا البنات كانهم اخواتهم بالظبط
بجد انا حصلت لي كذا صدمه من المناظر اللي شوفتها والحكاوي اللي سمعتها في المواصلات دي
المهم انا باحط راسي في المصحف او في اي كتاب ومبردش على اي حد حتى لو كان بنت لان البنات بتقول كلام ساعات اوحش من الاولاد
وبعد ما اوصل الجامعه
طبعا خلاص هدومي اتكرمشت وكل الكوي اللي كويته راح ع الفاضي والطرحه بازت
هاعمل عبيطه ولا كان في اي حاجه
اول السنه كنت باتوه جوا الكليه لحد ما الاقي اي حد من الدفعه بس بعد كده خلاص الحمد لله عرفت اماكن الحاجات
ادخل المحاضره اقعد زي البينش اللي قاعده عليه مينفعش تسالي اي سؤال لو مش عايزه تتهزاي
وهكذا كل المحاضرات
وبعدين لو عندي سكشن عملي ولا حاجه
في الكيميا تحاول تالف اي نتايج لان كل الاجنتس اكيد بايزه
ولو فيزيا فبرضه لازم تستعمل دماغك عشان تالف التجربه كويس او تنقلها من كتاب قديم لان الادوات قديمه وعمرها ما هتطلع اي حاجه مظبوطه
المهم الحمد لله خلصنا كل الفبركات واليوم عدى على خير
وانا طبعا ميته من الجوع بس مفيش وقت اكل عشان متاخرش
ممكن اجيب اي حاجه سريعه اكلها في المواصلات وفي الاخر اتكسف اكل في الشارع واروح بيها
المهم تيجي رحلة العوده الى المنزل
وطبعا استحاله تلاقي اي حاجه تروح بيهاتقعد ترسم خطه انا هاركب كذا وكذا وكذا وبكده هاوصل ان شاء الله بيتنا بعدين متلاقيش اول كذا تقوم تغير الخطه
لحد ما تلاقي اي نقطة بدايه تروح بيها
المهم الحمد لله باروح في النهايه
لو في صلاه اصليها
وطبعا اكل
وانام
اصحى كده بعد ساعتين اذاكر شويه
وبعدين اقرا قران وانام لحد الفجر وهكذا

ارشح بعدي دكتوره شيماء
يلا احكي لنا على ايامك اللي بتعملي فيها حاجات غريبه

كل دا بيحصل فى يومك اممممم ربنا يوفقك
ايه دا يا بنتى ولا كانك بتشتغلى
عارفه احلى حاجه ان اخوكى يوصلك وتصلى على طول ركعتين شكر

اه لو ربنا يهديه لي ويرضي يوصلني كل يوم
مش عارفه الصراحه ممكن اعمل ايه
يلا الحمد لله
اكبر شويه كده واجيب عربيه وعمري ما هاوصله في اي حته

ربنا يكون فى عونك يا جميل

يومى بقا انا ايام الدراسه طبعا كنت ساكنه مدينه السنه اللى فاتت كنا نصحى الفجر كلنا ونصلو الفجر جماعه ونقرا قوان ونذاكر شويا لحد الساعه 6 كد او7 ننزل عشان نجيب الفطار طبعا من المطعم وياويله اللى يبقى عليه الفطار المطعم تحت زحمه والبنت قرف وتقف في الطابور لحد مايجى دورك وتستلم التعين بتاعك اللى استغفر الله العظيم مش هاشتم نعمه ربنا مش هاقول غير حسبى الله ونعم الوكيل في الناس بتوع المطعم مافيش طبيخ بذمه الاكل لا لون ولا طعم ولا ريحه وبعد ما يجى دورك فى الطابور وتاخد الفطار تكون المحاضره الاولى ضاعت طبعا يادوب تلحق المحاضره التانيه و\من غير ما تفطر لو فاضى بين المحاضرات ترجع تاكل اى حاجه وتروح المحاضه اقعد ساكته بنكتب ورا الدكاتره وطبعا كلنا عارفين علوم بيكرهوا بتوع اسنااان ازاى ويخلص اليوم ونروح ونجيب الغدا ننزل المطعم تستنى طبعا كالعاده عشان تاخد الاكل لو كان لحمه تكون مش طايبه لو فراخ تكون بدمها لو بيض يكون نص سوايه كدا مافيش ضمير والخضار من غير تسبيك خالص نسوى الاكل وناكل وانام شويا ونصحى قبل المغرب ونقعد نذاكر نتكلم اى حاجه ونستنى المشرفات يتكرموا ويتممو لنا ويقفلو الباب من الساعه 6 المغرب ونصلى المغرب جماعه ونقعد نقرا قران لحد العشا ونصلى العشا ونسمع الدرس الدينى ونقو نكمل مذاكره لحد الساعه2 او3 كدا ونصلى القيام وننام ونصحى الفجر تانى


اليوم في رمضان يبدا من السحور اتسحر واستنى الفجر نصلى واقرا قران لحد الشروق واصلى الضحى وانام ساعه او ساعتين كدا واصحى عشان اساعد امى عشان لوحدها والصراحه انا قايمه بكل حاجه غسيل تصبين طبيخ وغيره لحد بعد الضهر كدا وانام شويا واصحى العصر اصلى ونسمع عمرو خالد وبوجى وطمطم ونقرا قران ونحضر الاكل ونفطر ونصلى ونقعد لحد العشا كد ونصلى التراويح وادخل المنتدى والنت وكدا لحد ما انام واقوم قبل الفجر اصلى القيام ونتسحر ويبدا اليوم من تانى

اما يوم بقا من ايامى الغريبه فى يوم قررت انزل البلد عملت اجازه ونزلت يوم الجمعه بدرى وركبت اتوبيس عشان اروح عبود وركبت ومتعتى انى اركب مواصلات بابقى فرحانه اوى ركبت الاتوبيس لحد مالقيت السواق بيقول اخرنا هنا بابص لقيتها مش عبود خالص سالت السواق قالى احنا هنا في المظلات قررت انى مش هاسافر ركبت نفس الاتوبيس ورجعت السادس عند منال صديقتى وقعدت معاها كانت رايحه عندعمها تجيب تذكرة ابوها عشان جاى من الصعييد ومسافر اسكندريه عشان يكشف وروحنا مصر الجديده جسر السويس وجبنا التذكره والدنيا حر والمواصلات طبعا كدا اتصلت بابوها قالها هاتى التذكره ليا عند عمتك وعمتها دى في الجيزه فيصل ركبنا للسابع ونزلنا ركبنا اتوبيس 555 وروحنا الجيزه واخدنا مواصله لفيصل ووصلنا الحمد لله عند ابوها اتغدينا وقعدنا شويا وقالت مادومنا هنا فى الجيزه نطلع علي المنيب نروح عند خالها تجيب الفلوس بتاعه امها عشان مترجعش تانىركبنا روحنا المنيب شعبى اوى واقصى وسيله مواصلات فيه الحمير المهم جبنا الفلوس وركبنا مترو روحنا التحرير نزلنا هناك واتمشينا شويا على الكورنيش ودوره وترمس ومركب فى النيل وروحنا الموقف عشان نركب السابع او السادس لقينا رمسيس بس ركبنا رمسيس ونزلنا وسط البلد اشترينا حاجات وركبنا وروحنا بس كان يوم متعه بجد احلى حاجه فيه المواصلات دى كلها مع اننا تعبنا اوى بجدواكلنا كشرى ونمنا للصبح بعد ماصلينا طبعا وكدا وبسسسسسسسسسسسسسس

دكتوره شيماء نسيتى ترشحى العضو الى بعدك؟؟؟؟؟؟؟؟

بعد اذنك دكتورة شيماء لوتسمحيلى ابقى بعدك ولو رافضه ابعتيلى ع الخاص وانا هحذف يومى اللى كتبته
هوه يوم لسه حاصلى من قريب شركة المصرية للأتصالات نزلت مسابقة وطالبين فيها بلأسم تخصصات تربية واداب قسم فرنسي وانجليزى وألسون
المهم انا عرفت بالمسابقة من يوم السبت وهى هتنزل ع يوم الاحد وقولت من بكرا الصبح بدرى هكون عندهم وأقدم وفعلا من 8 الصبح كنت واقفة ومستنيه الموظفين يجوا ع 8 ونص وانا افتكر اننا كنا اربعة اللى بيقدموا وشافت ورقى ولقته تمام بس وقف ع البطاقة لأن بطاقتى طالعة ع سوهاج والمسابقة خاصة بأسيوط وشرط اساسى ان البطاقة تكون ع اسيوط والله لقيت الموظفة بتقولى خسارة خسارة بينى وبينكم انا خرجت مكتئبة جدا لانى من ساعة ماتخرجت وأول مرة يطلبو فيها فرنش بالاسم
المهم روحت البيت قولت لخالو ولماما انا هسافر سوهاج وهغير البطاقة خالو قالى سافرى وماما قالتلى اجى معاكى وبعد ماكلمت عمى وقلتله ع الطلبات ظهرتلى مشكلة تانية علشان اغير محل الاقامة في البطاقة لازم اجيب عقد شقة او وصل نور باسمى او باسم والدى الله يرحمه طبعا انا والدى مالوش املاك خالص في اسيوط لسبب بسيط هوه طول عمره عكس اخواته من الناس اللى بيكرهوا المعيشة في اسيوط قالولى طيب لعمك اكتشفت ان عمى الكبير برضه معندوش املاك في اسيوط والمهم رسيت على عمى الصغير طلعتلى مشكلة تانى لازم بطاقته تكون ع اسيوط سألته طلعت بطاقته ع سوهاج وسألت مينفعش خالو قالولى لأ الخال من الدرجة التانية قالولى ينفع خالك يعملك عقد ايجار شقة في الشهر العقارى خالو قال ماشي وفعلا روحت عملت العقد بس الموظفه ربنا يسامحها بقى خالو سألها كدا خلاص قالتله خلاص دا كان يوم الاحد سافرت يوم الاثنين علشان اعملها مستعجل وبعد ما استنيت لغاية 12 ونص الموظف قالى مينفعش فيم محضر توثيق العقد ازاى عملتى عقد من غير محضر توثيق المهم دخلت لرئيس المباحث وكالعادة لازم نلجأ للواسطة لما بتتقفل في وشنا الأبواب برضه الضابط قالى مينفعش زوجة خالى كانت معايا وقالتله حاول قالها والله اتسأل فيها نيابة ادارية قالى تعالى بكرا وانا اعملهالك قلتله ماشي رجعت وانا شبه دمار ع امل الحق الشهر العقارى واعمل محضر التوثيق المهم ملحقتش كان اقفل بما ان احدهم علمنى لايأس مع الحياة استنيت لتانى يوم اللى هوه الثلاثاء وروحت خلصت الورق انا وخالو في الشهر العقارى وسافرت تانى والظابط قالى هحاول اسلمهالك بكرا المهم سيبت الوصل مع المهندس على والبطاقة القديمة علشان اول مايستلمها يبعتهالى ع طول
المهم ع يوم الاربعاء اتصل بيا المهندس على وقالى بصي والله حاولنا انها تكون معاكى انهاردا بس صعب جدا الضليط وعدنى انها هتكون ع 9 الصبح معاه ايه رايك ابعتهالك ولا تيجى تاخديها لان يوم الخميس ده اخر يوم للمسابقة
المهم قلتله لا انا هجيلك بكرا من 8 ونص وهستلمها بنفسي والله كتر خير الراجل جه معايا انا وامى ودخلنا للظابط بس مكنتش لسه خلصت كان فاضلها ساعة راح الضابط زعق في الموظف وقاله اما انتم بتعملوا كدا مع اللى تبعى امال المواطن العادى بتعملو معاه ايه؟ نص ساعة بالكتير وتكون عندى
وفعلا بد نص ساعة استلمتها وخرجت من سوهاج ع 10 ونص واول ماوصلت اسيوط خلاص في دكاغى هيقلولى المسابقة خلصت كدا يعنى او الطلبات خلصت المهم روحت بتاكسي من برا برا ع المصرية للأتصالات وقدمت وكنت اخر طلب بيتقدم والموظفة كانت مبسوطة منى جدا قالتلى حلو الأصرار دا وواحدة تانية قالتلى انا هسميكى المكافحة وفضلت اى حد يدخل تحكيله انى غيرت البطاقة
المهم انا مبسوطة وادعولى انى الاقى تعبي واشتغل في الوظيفة دى
رغاية انا عارفه بس معلش اللى المغزى الاساسي من اليوم دا ليا ولكل اللى هيقراه صمم وقول يارب وادعيله من قلبك هيسببلك الاسباب وهتلاقى ناس بتقف جنبك وانت اساسا مش متوقع ان دول هيقفوا جنبك وان اللى انت متوقعه يوقف جنبك خذلك

ربنا يعينك ويكتبلك الشغل ده
وباذن الله ربنا مش هيضيع تعبك

اللهم امين وشكرا ليك سمارت ع قرايتك ليومى الشاق جدا

ان شاء الله ربنا معاكى ياريم ومايضيع تعبك

انا هارشح العضو الى بعدى سمارت
سمارت احكيلنا عن يوم فى حياتك

يابنتى اسمارت قال رشحى حد غيره