خدعــــــــــــــــــــوك فقالوا ...البنت هي السبب

ديما مجتمعنا المصري ,و العربي بشكل عام بيقول إن البنت هي المسؤوله عن ظاهره المعاكسات ...وبيعلل ده بأسباب كتير لكن.....هل ده صحيح ؟؟هل البنت فعلا هي السبب ؟؟,,تعالوا نناقش الموضوع ده بموضوعيه. .
هل البنت هي المسؤوله بس, طيب الولد اللي بيعاكس ده ايه موقفه من الموضوع غلطان ولا لاء هيقولو لاء هو معزور لان البنت بلبسها وطريقه مشيتها وكلامها هي اللي خلته يعمل كده واي ولد بيعاكس البنت اللي مش محترمه ونادراً جدا لما بيعاكس البنت المحترمه هو ده كلامهم وتبريرهم للموضوع

وانا رأيي المتواضع في الموضوع ده هو اننا مش من العدل اننا نحمل البنت لوحدها المسؤوليه كلها لان الولد اللي بيعاكس هو كمان غلطان بدليل اننا بنشوف بنات كتير بتتعاكس مع ان لبسهم في قمه الاحترام . . .مين بقي اللي غلطان في الحاله دي ؟؟!!الولد بس طبعا
ثم انهم بيقولو اي ولد بيعاكس البنت اللي مش محترمه ونادراً جدا لما بيعاكس البنت المحترمه يعني الولد هو اللي بيختار يعاكس دي وميعاكسش دي

طيب زي ما بيختار يعاكس مين وميعكسش مين ليه مايخترش مايعكسش اصلا (لا دي ولا دي) ايه اللي هيحصل يعني ؟؟؟
هي المعاكسه دي شيء لا ارادي يعني عند الولد ميقدرش يمنع نفسه منه ؟؟؟
لاء طبعا
يعني لو البنت غلطت لازم الولد كمان يغلط ويعاكسها
يقول اشمعنا انا
لو هي مش محترمه خليك انت محترم يا أخي ....لكن طبعا مش كل الاولاد بيعاكسو في منهم المحترمين مع انهم بقو قليلين جدا لكن لسه موجودين ...زاما بقى الاولاد اللي بيعاكسو فهم في نظري حاجه من تلاته

النوع الاول بيقول انه بيعاكس بخفه دم من غير ما يجرح البنت وهو شايف انه مش بيدايق البنت بده ولما بيتسأل ليه بيعمل كده يقول :اهو ادينا بنتسلى

أما بالنسبه للنوع الاول فانا بقوله ان المعاكسه غلط سواء كنت بتعملها بخفه دم او بتعملها بغلاسه المشكله مش في الطريقه المشكله في المبدأ نفسه ثم مين قلك ان البنت مش بتدايق لما بتعكسها حتى لو كنت بتعاكسها بخفه دم زي ما بتقول ثم ان اي بنت بتتعاكس بنتدايق وبتحتقر الولد اللي بيعاكسها كمان وبتحس انه مش راجل يعني من الاخر بينزل من نظرها اما بقى موضوع انك بتتسلى فيريت تدورلك على حاجه تانيه تتسلى بيها غير بنات التاس يا كتكوت

ان النوع التاني بقى لما بيتسأل بيعاكس ليه بيقول انه بيعاكس بس البنت اللي بتلبس لبس ملفت وان البنت دي هي بلبسها ودلعها هي اللي بتخليه يعمل كده وهي اللي ل بتبقى عاوزه كده عشان كده حتى لو تمادى في المعاكسه بيحس انو مش غلطان وان البنت تستاهل كل اللي يحصلها

بالنسبه للنوع التاني ....اما بالنسبه للنوع التاني فانا احب اقول له ان المحترم محترم في اي وقت واي مكان ومع اي حد سواء كان الحد ده محترم ولا لاء ومفيش حاجه اسمها هي اللي خلتني اعمل كده كل انسان في الدنيا دي له ارادته المستقله ومش معنى انها غلطت ان ده يبررلك انك تغلط انت كمان لان الواحد مش لازم ابدا يكون زي البوبي اللي اول ميشوف عضمه لازم يجري وراها ويقول ماهي هي اللي جانلي لحد عندي احنا بشر عندنا عقل بيميز الصح من الغلط حتى لو كانت هي اللي عاوزه كده انت ماتقدرش تقول لاءه معندكش كرامه او اراده او رجوله ليه ما تعملش زي سيدنا يوسف وتقول اني اخاف الله

اما النوع التالت ده بقى غريب جداً والنوع ده لما بيتسأل نفس السؤال بيقول انا بعمل كده عشان البنت تتعلم وما تلبسش كده تاني

النوع التالت احب اقوله يا سلام على الهدف النبيل بتاعك واحب اقولك ان دي حجه مش سبب وبعدين انت فاكر نفسك مصلح اجتماعي يعني انت مالك وما بنات الناس كل واحد بيتحاسب عن نفسه وبس ثم انا ليه بتضحي وبتيجي على نفسك اوي كده وبتعكسها احب اقولك ان انت لو ما عملتش كده في ولاد كتير غيرك مستعدين يقومو بالمهمه دي ويكملو رسالتك التبيله اقصد ان البنت بسبب الحجه بناعتك دي او اي حجه تانيه

لكن طالما الولد هو كمان غلطان زيه زي البنت اما ليه المجتمع ديما بيحمل البنت المسؤوليه الاجابه بسيطه جداً للاسف مجتمعنا مجتمع ذكوري والرجل بطبعه مابيحبش يعترف بغلطه ومستعد يكابر لاخر لحظه ودي صفه متنشره اكتر في غالبيه الرجاله الشرقيين مش كلهم وده على فكره مش كلامي ده كلام علماء النفس لدرجه ان واحد فيهم قال الرجل دائما في حاجه لزوجه لانه سيأتى الوقت الذي يخطىء فيه خطأ لا يستطيع القاء اللوم فيه على الحكومه وبالتالي هيحمل زوجته المسؤوليه بس هي دي القضيه

موضوع جميل ياساندى وفعلا دى مشكلة بتلاقيها كل بنت سواء كانت لابسه محترم ولا لأ حتى اللى لابسه الخمار بتتعاكس
واهم نقطة بتؤدى لكدا هى غياب الوازع الدينى عند الشباب لو الشباب يغض البصر عن اى فتاه ويعرف ان النظرة دى سهم من سهام ابليس ويؤمن بكدا مكنش فكر يرفع عينه في وجه فتاة سواء لابسه محترمه ولأ
وكمان في دور ع البنات يعنى بلاش اللبس الاوفر اللى بنشوفه دا
موضوع جميل وتقبلى مرورى