هل انت(ي) ضد أو مع

اولا ارد عليكى ع موضوع النقاب انا قصدت نقاب من غير ماتبين عنيها وفيها ايه بقى لو تحته حاطة مكياج ولا لا ولا حتى بتندغ لبان اما لو هتبين عنيها عاوزة تحط المكياج تحطه ماعدا مكياج العيون


ثانيا لا طبعا انا مش مع كدا ان البنت تجبراساسا ع الزواج سواء قريب ولا غريب


سؤالى بقى

هل انت مع ام ضد ان البنت تتزوج واحد غريب عن بلدها وطبعا هتسافر وتعيش معاه ولا لازم يكون من بلدها علشان يعيشها جنب امها ؟ بجد ممكن كتير يشوفه سؤال تافه بس عندنا هنا في اسيوط وخصوصا مع امهات صحباتى الموضوع دا مهم جدا

طبعا انا مع ان البنت تتجوز وتسافر بعيد او على حسب شغل جوزها وبعدين لو كل ام عاوزه بنتها تتجوز وتعيش جنبها يبقى بلاش تتجوز احسن اهم حاجه يكون يستاهل للسفر والغربه مش تتجوز واحد وخلاص اى كلام يعنى

دا قصدى

وبالنسبه للسؤال نسمع اراء الباقى لنفس السؤال


وتقبلى مرورى

من رايى الغربه لا
لازم يكون من بلدها على الاقل
اما يغلط يلاقوا حد يعاتبوه
وهيكون فى بينهم عشم
لكن الغريب دا لا ماعتقدش بس انا ضد كدا


والسوال هوا

العلاقات الاوفر على شبكات الانترنت
طبعا بين الاولاد والبنات ؟

الله يرحم البنات والشباب منها مالهاش لازمة خالص وربنا يهدى بنات وشباب المسلمين
ودى من ضمن عيوب الانترنت ويارب اهدينا وابعدنا عنها

سؤالى هوه
منع الموبايلات عن الاطفال ؟

انا عن نفسي ضدها لأن المثل بيقول ابو بالين كداب واكيد هيتأثر بيتها في سبيل مذاكرتها
او هتتأثر مذاكرتها في سبيل بيتها
وع العموم في الاول والاخر دى تبع النصيب وربنا يوفق الكل ان شاء الله


وسؤالى هو هل انت مع ام ضد ان البنات تسافر للرحلات التابعة للجامعة او مراكز الشباب او الحزب الوطنى ..... الخ ؟

انا ضدها بس مش فى كل الحالات اما تكون الرحلات مع بنات اوك تطلع
لكن اى مراكز شباب دى والنظام ده



والسوال
انت مع ولا ضد الحرب الى قايمه بين مصر والجزاير اليومين دول عشان الكوره؟ ورايك فى الطرفين؟؟؟؟؟؟؟؟؟؟؟؟؟؟

هل انت مع او ضد
ان انا منقطع عن المنتدي من 5 شهور
وحشتوني جدا والله
واتمني ربنا يكون وفق الجميع

هل انت مع او ضد
ان انا منقطع عن المنتدي من 5 شهور

اممممممممممم طبعا دي جريمه في حق الانسانيه
اكيد انا باهزر

الجد بقى
ان هو دا الصح لان في الدراسه الواحد عنده مليون حاجه
ولما تيجي ترتب اولوياتك تلاقي المنتدى جه في اخر القايمه
دا غير لو احتاجت من المنتدى حاجه مفيده او معلومه للدراسه
انما اصدقائك في المنتدى والمواضيع العامه في المنتدى
فاللي انا شايفاه ان احنا بنتكلم ع المواضيع دي بمبالغه
يعني مثلا انت كتبت ان المنتدى وحشك جداااا
مع ان لو ركزت شويه هتلاقي ان اللي وحشك فعلا انك يكون عندك وقت فاضي
وحشك جو الاجازه
والمنتدى ممكن يكون وحشك برضه بس هيوحشك بس من غير جدااااا
بعني هي دي وجهة نظري او اللي انا حسيته فعلا يعني انا الاجازه اللي فاتت كنت باشارك في المنتدى كتير وكنت متخيله ان المنتدى هيوحشني جدا في الدراسه
بس اللي اكتشفته فعلا ان المنتدى كان ملئ فراغ لاغير
واكيد استفدت كتير بس مش قد الوقت اللي ضيعته
انا عارفه ان رايي مش هيعجب ناس كتير وانا كنت متردده اكتبه بس فعلا دا اللي دار في دماغي لما شفت مشاركتك
عامة كل سنه وانت طيب يا دكتور وعقبال النتيجه والتخرج باذن الله

وسؤالي
هل انت مع او ضد
ان صديق الانترنت هو صديق الفراغ ولغة المنتديات هي لغة المبالغه

متشكر للتعقيب المفصل يادكتورة
وهذه وجهة نظري
اولا لايوجد شئ اسمه صداقة الانترنت
في النت الواحد بيعرف شخصيات اصحاب وجهة نظر قد تكون محترمة او لا
لكن الصداقة حاجة تانية والدليل ان الواحد مينفعش يستغني غن صديق
طيب نيجي للسؤال المهم
يبقي ايه النت والمنتدي وكل الكلام ده
دي مساحة للتعبير عن الراي بحرية
اللي احنا كشباب مفتقدينها ومحرومين منها
كل مجموعة متفقين في توجهاتهم بيجتمعوا في منتدي يتبادلوا وجهات النظر
ويخرجوا طاقات ذهنية بلدنا مانعانا ان احنا نوجهها في حاجة مفيدة
وعلي هذا الاساس
لايمكن ان الواحد يرتب اولوياته
علي ان يكون التعبير عن الرأي مقدم علي فترات امتحان عصيبة
فحينما يأتي الفراغ
تستمتع الشخصيات المثقفة بابداء الاراء والحوارات الجادة
ولذلك انا اللي كان واحشني الحوار المهذب والاراء المثقفة
وليس انني لا اعلم كيف ادير وقت فراغي فالجأ الي النت
ولذلك انا ضد ان صديق النت صديق الفراغ

ماشي اوك راي حضرتك ولازم نحترمه
بس في لسؤالي تكمله مجاوبتش عليها
وهي ان اللغه السائده في المنتديات هي لغة المبالغه
يعني لما حد بيقول شكرا بيكتب شكراااااااااااااااااااااااااا
وعلى كدا في كل كلامه
انا مش شايفه للمبالغه دي لازمه ولا شايفاها عيب
بس معرفش ليه بنبالغ في كلامنا
وعلى فكره انا مقلتش انك مكنتش عارف تضيع فراغك
انا فلت وحشك انك يكون عندك فراغ
ولما اتكلمت عن تضييع الوقت اتكلمت عن نفسي وبس
كان الكلام علي وقلت انا اللي ضيعت وقتي
شكرا لتعقيبك المفضل يا دكتور
(على فكره من غير زعل تعقيبك المفضل دي دمها تقيل

انا عارف ان انتي مقولتيش كده
كل ماهناك
ان انا بشرح وجهة نظري كاملة
بما فيها مايتضمنه السؤال وغيره
مش اكتر
وبالنسبة للمبالغة دي موجود ة طبعا بشكل ملاحظ
لكن لي تبرير قد يكون خطأ
ان احنا كشباب مش مؤهلين للتعبير عن راينا
فلما لقينا المنتديات عملنا زي المحروم اللي لقي لحمة
ومن المتوقع ان ده يقل بعد كام سنة
لما نتعلم كويس ازاي نعبر عن ارائنا صح
لكن انتي طرحتي موضوع جدير بالاحترام
اشكرك عليه

فين سؤالك يا دكتور